محتويات المقال
مرة ابني راح يتغدى في بيت صاحبتي، فبتسأله: أحط لك بامية؟ قال لها يعني إيه بامية؟ طبعًا هي مسكتني تريقة إني حارمة الولد من البامية ومش باطبخ ومش متخيلة إن ربنا رازقني بطفل picky eater (صعب في اختيارات الأكل) من الأطفال اللي مش بياكلوا في حياتهم غير نوعين تلاتة، ومش بيعجبهم العجب مهما عرضنا عليهم أنواع مختلفة، وانا أول واحدة فيكم باعاني من الموضوع ده مع ولادي الاتنين وعارفة الموضوع قد إيه ممكن أوقات يوترنا. عشان كده، هاقول لكم النهارده 5 حلول بسيطة ساعدتني مع ابني إني أحسن جودة أكله بعد تجارب كتير فاشلة.
5 نصايح لتشجيع الأطفال على الأكل
-
الروتين:
اللي متابعني عارف أنا قد إيه باشجع الأمهات على تعويد ولادهم على روتين يومي في كل حاجة في حياتهم. وفكرة إن الأكل كمان يكون له روتين وبمواعيد ثابتة يوميًا على قد ما نقدر بتشجع الأطفال أكتر علي الالتزام بوقت الأكل، وكمان يتعودوا إن لما وقت الأكل بيخلص ويتشال مفيش اختيار إنهم يطلبوا غيره وقت ما يحبوا لإن له مواعيد ونظام ثابت.
-
ممنوع الشاشات:
باشوف أمهات من وهم ولادها لسه بيبيهات بيشغلوا أغاني على التليفون عشان البيبي يتفرج عليها ويتشغل وياكل، وهم مش متخيلين قد إيه العادة ده مؤذية للأطفال على المدى البعيد، غير أضرار السمنة اللي بتسببها للكبار، فهي بتعمل تشتيت للأطفال الـ picky eaters وبتخليهم مش مركزين في أكلهم وبيحسوا إنهم بقى لهم كتير بياكلوا وبيشبعوا بسرعة من غير ما يكونوا أكلوا أصلًا.
-
تجنبوا الخناق بسبب الأكل:
نحاول ما نضغطش على ولادنا بدافع خوفنا عليهم، ونحترم فكرة إن كل واحد شهيته مختلفة عن التاني، عشان ما نربطش فكرة الأكل بطريقة سلبية في عقلهم، فتقلب معاهم بعند ورفض لوقت الأكل.
-
صديقي الصدوق الـ finger food:
بما إن ولادي الاتنين عايشين بقوة الطاقة الشمسية تقريبًا، فكان من أكتر الحاجات اللي بتطمني إنهم أخدوا العناصر المهمة اللي محتاجينها هي إني باستخدم الـ finger food معظم الوقت، وقت السناك باكون محضرة طبق فيه مكعبات خضار أو فاكهة محطوط جنبهم وهم بيلعبوا، وقت الخروج كمان مهم جدًا يكون معايا، عشان وقت ما يجوعوا ما نضطرش نلجأ لأكل مش صحي من بره. وده كان تقريبًا أكتر وقت بيستمتعوا بالخضار والفاكهة اللي معاهم لإنهم بيلعبوا ومبسوطين وجعانين.
5 أفكار لأكلات الرضع: بيبي فوق 6 شهور
-
تحضير الأكل:
من الحاجات اللي بتشجعهم كمان هي إنهم يحضروا الوجبات بنفسهم، ويزينوها معانا، ويشتروا كمان حاجة السوبر ماركت، فكرة المشاركة بالنسبة للطفل من أكتر الحاجات اللي بتديله ثقة في نفسه وتشجعه علي السلوك الصح، أنا كمان باعمل مع ابني حركة لذيذة هي إنه بيختار معايا منيو الأسبوع بتاع غدا البيت ومتفقين إننا هنختار الأصناف مع بعض وملزمين كلنا ناكل الأصناف اللي التاني اختارها، بس طبعًا يكون عارف إن الاختيار أكلات البيت الصحية مش junk food.
وفي الآخر بقى، بلاش القلق الزيادة والتركيز والكلام على موضوع قلة الأكل ده، لإنهم لما يجوعوا، هياكلوا ولما يعرفوا إن فيه نظام هيلتزموا بالوقت، المهم نحاول إنهم ياخدوا العناصر الأساسية بأي طريقة ونبتكر في الأكلات ومش غلط إننا نخبي بعض الحاجات الأساسية في الأكلات اللي بيحبوها لحد ما يتعودوا على طعمها.
