محتويات المقال
المرة الأولى من كل حاجة بتبقى مميزة وبتحتاج تفكير طويل دايمًا. فلو انتِ بتفكري تعملي تاتو لأول مرة في أي مكان في جسمك، في المقال ده هنقول لك 8 نقط محتاجة تفكري فيها. افتكري إن فيه أنواع تاتو ممكن تقعد معاكي شهور أو سنة (اسمه تاتو مؤقت) وفيه أنواع بتفضل معاكي على طول ومسحها مكلف جدًا ومؤلم جدًا. المقال ده لكل الستات اللي خلاص أخدت قرار التاتو، بيقول لها نصايح ممكن تعملها قبل ما تاخد الخطوة.
نصائح قبل الوشم
1. خدي وقتك في التفكير
لو التاتو هيقعد معاكي سنين، أو طول حياتك، يبقى على الأقل ادي نفسك مدة كافية إنك تفكري. فاكرة من 10 سنين كانت أحلامك إيه وكنتِ بتفكري إزاي وبتحبي إيه؟ شفتي قد إيه اتغيرتي؟ إيه هي الحاجة اللي ما اتغيرتش؟ أسهل طريقة في إنك تختاري شكل التاتو اللي عايزاه هو إنك تفكري إيه هي الحاجة اللي هتفضلي دايمًا تحبيها، هتفضل دايمًا لها معنى أو قيمة كبيرة عندك؟ كمان ممكن تعملي رسم حنة بالشكل اللي تحبيه وتشوفيه عليكِ وتشوفي قد إيه مرتاحة لشكله وإذا كان هو ده الشكل اللي انتِ عايزة تكملي به.
2. خدي وقتك في التدوير
لو لكِ صديقة أو صديق حبيتي تاتو عاملينه، اسأليهم عملوه فين. أو دوري على فيسبوك عن كل الاستديوهات والأماكن اللي بتعمل تاتو في القاهرة، وبصي على الصور بتاعة كل واحد فيهم. تقدري تعرفي مدى احتراف فنان الوشوم من الصور دي. ولو الصور كلها لرسوم بسيطة، يبقى ما تروحيش للمكان بصورة معقدة أو تفاصيلها كتير لأنه ممكن ما يقدرش ينفذها صح.
3. روحي لدكتور الجلدية
يفضل تروحي لدكتور جلدية قبل الخطوة دي عشان تعرفي لو عندك أي حساسية من أي حاجة ولو حالتك انتِ بالذات ينفع أو ما ينفعش فيها التاتو.
4. اختاري صح
فنان التاتو الشاطر هيسألك وهيسمع منك قبل ما يبدأ. لو مجرد ما دخلتي سألك إيه الشكل وابتدا يجهز العدة، امشي. مفروض فنان التاتو يسمع منك الشكل اللي عايزاه بالتفصيل والمكان اللي عايزة فيه الشكل والمقاس اللي عايزاه. ولو فيه تصميم معين للشكل ده. يعني لو عايزة شكل شجرة مثلًا، فهل شجرة شبه شجرة الحياة ولا شجرة أصغر، شجرة إيه، شكلها إزاي؟ وهكذا.
5. المكان اللي هتعملي في التاتو
لا مش المكان في جسمك، المكان حرفيًا. لازم يكون المكان متعقم كفاية. الترابيزة مثلا مش جلد أو رخام إنما ستانلس ستيل، سطح ينفع تعقيمه. لازم تتأكدي إن اللي هيعمل لك التاتو بيفتح قدامك سن إبرة جديد تماما وsingle use ولازم تتأكدي إن الحبر ما تمش استخدامه قبل كده لتفادي أي أمراض منقولة بالدم.
6. الرخيص قوي غالبًا مش آمن قوي
زي ما بتختاري الكوافير اللي يصبغ لك شعرك بتأني وبيبقى عندك استعداد تدفعي كتير، خلي عندك نفس الاستعداد في التاتو.
7. حضري نفسك يومها
نامي كويس وكلي كويس وممكن كمان تاخدي معاكي حاجة مسكرة للاحتياط. وأهم من ده، حضري نفسك نفسيًا إن فيه لوحة هتنطبع على جسمك وإن شكل المكان اللي هتنطبع فيه هيختلف من هنا ورايح، وإن دي حاجة جميلة. كمان حضري نفسك للوجع. أيوة هيرش لك بنج موضعي على مكان التاتو لكن ممكن تتوجعي برضه. فحضري نفسك للوجع ده وحاولي يكون معاكي حد من أصحابك عشان تتسلي معاهم في دردشة أو حتى يمسكوكي عشان ما تتحركيش والتاتو يبوظ.
8. وقت التعافي
لأن التاتو الجديد ممكن يعمل حواليه التهاب سطحي أحمر، فاديه له وقته (متوسط أسبوعين) عشان يهدا. كمان اسمعي كلام فنان التاتو كويس لأنه غالبًا هينصحك بحاجات تعمليها للتاتو عشان تضمني إنه ما يعملش أي التهابات أو يتلوث. كمان لو نصحك بكريم أو مرهم معين للمكان، يفضل تستخدميه بانتظام.
نتمنى لك اختيار موفق وتاتو جميل يزينك ويضيف لك حاجة تحبيها. لو عملتي تاتو، احكي لنا في التعليقات عن التجربة.
