محتويات المقال
إحنا دلوقتي في موسم اختيار المدارس وتوقيت عمل مقابلات القبول للأطفال للسنة الدراسية الجاية، عدد من أسماء المدارس بيتقال كل يوم، آراء وتجارب بنقرأها وبنسمعها طول الوقت، أنظمة تعليم وطرق تربوية مش عارفين الفرق بينها، ومطلوب مننا نقرر حالًا علشان نلحق.
أنا في الموقف ده، محتارة وتايهة وقلقانة تماما، علشان كده قرأت وحضرت حاجات تساعدني على اتخاذ القرار الصح أو المناسب وحبيت أشاركها معاكم على أمل إنها تفيد أي أم بتختار مدرسة طفلها دلوقتي:
*ملحوظة: النصائح دي هتناسب الأمهات والآباء اللي بيختاروا مدرسة الطفل الأول أو لو محتاجين يحولوا لطفل من مدرسة لمدرسة.
قبل ما تدخلي نفسك في أسماء 30 مدرسة في منطقتك والمناطق القريبة منك، لازم تحددي الأول 3 حاجات:
- طفلي محتاج إيه؟
- أنا عاوزة إيه؟
- أنا أقدر على إيه؟
طفلي محتاج إيه؟
الإجابة على السؤال ده لازم تكون واضحة جدًا في ذهنك قبل الاختيار، هل هو محتاج نظام دراسي خفيف ولا تقيل، هل محتاج مدرسة تقبل الدمج لو هو عنده أي حالة خاصة؟ هل هو في حضانة ألماني فمن الأحسن له أدخله مدرسة ألمانية؟، هل هو طاقته البدنية محدودة أوي فمحتاج أقرب مدرسة للبيت علشان ما يبذلش طاقته في الطريق رايح جاي؟
كل التفاصيل دي وزيادة عنها لازم تجاوبي نفسك عليها.
أنا عاوزة إيه؟
أنا عاوزة ابني أكسنت الإنجليزي بتاعته تكون كويسة بصرف النظر عن أي حاجة تانية، أو أنا عاوزة ابني يتعلم في مدارس لها طابع إسلامي أو مدرسة منفصلة مش مشتركة. لا أنا عاجبني النظام التربوي في المدارس الألمانية، بس أنا مقررة أستقر في أمريكا بعد كام سنة فمحتاجة ابني يتأقلم على الأمريكان سيستم.
انا ابني الكبير في مدرسة كذا ومرتاحة لها وعاوزة أخوه الصغير يكون معاه في نفس المدرسة.
هاتي ورقة وقلم واكتبي متطلباتك بالزبط علشان ما تنسيش أي تفصيل.
أنا أقدر على إيه؟
أنا إمكانياتي المادية (مبلغ محدد) في السنة بالباص والكتب واليونيفورم، ومش هقدر أزود ألف جنيه عن المبلغ ده.. مثلًا.
أنا ساكنة في أكتوبر بس في مدرسة هموت عليها في التجمع الخامس، يا إما أكنسلها من اختياراتي يا إما شوفي إذا في إمكانية لتغيير مكان سكنك إذا إنتي شايفة إن دخول المدرسة دي قضية حياة أو موت بالنسبة لك.
أنا ساكنة في شيراتون ومعايا بيبي صغير والمدرسة اللي أنا عاوزاها لابني الكبير في المعادي، مش عارفة الباص له خط لشيراتون ولا لا ولو في يوم ميتنج أو أي حاجة استدعت إني هروح المدرسة مش هقدر أتحرك بالبيبي المسافة دي كلها.
المدرسة اللي أنا عاوزاها مستواها التعليمي فوق الممتاز وهقدر على مصاريفها، لكن المستوى المادي للناس اللي فيها عالي جدًا عليا، وخايفة ده يأثر على نفسية ابني ويحس إنه أقل من باقي زمايله لأني مش هقدر أعيشه في نفس المستوى المادي لبقية الطلاب.
أنا عاوزة أدخل ابني British بس هو المذاكرة فيه تقيلة شوية وأنا مش هقدر اتابعه نهائي وهتعصب عليه طول الوقت وعلاقتنا هتبوظ بسبب المذاكرة.
أنا هدخل ابني مدرسة ناشونال وهعوض له موضوع اللغة بكورسات لما يكبر.
بعد لما تكتبي كل النقاط اللي طلعتي منها من الـ 3 أسئلة اللي فوق، استخدمي نظام الاستبعاد في الاختيار، فمثلا أنا ساكنة في أكتوبر؟ يبأه كل مدارس التجمع وطريق مصر الاسماعلية وكل المناطق البعيدة، ملغية.
أنا عاوزة مدرسة فرنساوي، يبقى كل المدراس باللغات التانية ملغية وتبدأي تستبعدي المدارس الفرنساوي اللي مش في حدود طاقتك المادية، وهكذا..
نصائح عامة:
- لو ابنك في حضانة بتثقي في تقييم القائمين عليها، استشيريهم في النظام التعليمي المناسب لإمكانيات طفلك.
- اتعلمي واقرأي واسألي أكتر عن مميزات وعيوب كل نظام تعليمي.
- ما تنبهريش بأسماء المدارس المشهورة لأن الشهرة مش شرط تكون دليل على جودة التعليم والتربية.
- لو هتسمعي تجارب من حد، لازم تقيمي التجربة كاملة، يعني لو واحدة قالتلك دي مدرسة تعاملهم وحش جدًا معايا، لازم تعرفي هي كمان تعاملها عامل إزاي معاهم، ممكن تكون هي اللي بتتعامل بشكل سيئ.
- حاولي يكون القرار الأخير مسؤوليتك إنتي وزوجك أو والد طفلك لو إنتو منفصلين، علشان متتحمليش مسؤولية القرار لوحدك.
- خلي مصلحة ابنك هي أول حاجة تحسم لك الاختيار، مش البرستيج أو تقليد الـ community اللي إنتي فيه.
- قرار اختيار المدرسة صح قرار مصيري، لكن هو بردو مش قرار لا رجعة فيه ومش هقدر أغيره طول عمره.
- ما تستسهليش وتدخلي أي مدرسة وتقولي بعدين هحول له لو معجبتنيش، لأن الطفل بيخسر أصحابه وبيخسر تأقلمه في الجو اللي اتحط فيه.
- ادعي ربنا كتير إنه يوفقك للاختيار الصح.
ودلوقتي قوليلي إيه طريقتك المفضلة في اختيار مدرسة ابنك؟
