خلينا نعترف إن الشمس عندنا خصوصًا في الصيف بتكون قوية جدًا. فلكِ أن تتخيلي إن أثر الشمس دي على بشرة أطفالنا إحساسه هتكون عاملة إزاي. لازم تعرفي إن حروق الشمس اللي ممكن يتعرض لها طفلك خصوصًا لو بيخرج للنادي أو بيلعب في البحر أو البيسين ممكن تكون محفز قوي لإصابته بمرض سرطان الجلد في مستقبله. لازم تعرفي إن السعي لحمايتهم من الآشعة فوق البنفسجية الضارة من الشمس مش رفاهية أبدًا. وهنستعرض معاكي شوية خطوات لازم تلتزمي بيها لحماية جلد طفلك.
حماية الطفل من آشعة الشمس
- احرصي على تواجد طفلك في الظل
الآشعة فوق البنفسجية بتكون في قمة نشاطها وضررها في فترة الظهيرة. علشان كده، بينصح أطباء الجلدية إن الفترة دي تخصصيها للقيام بنشاط داخلي بعيدًا عن التعرض للشمس. ولو مش متوفر، دوّري على مكان ظل تحت شجرة أو مظلة.
- غطيه على قد ما تقدري.
- طبيعة بشرة طفلك الحساسة بتكون حقيقي مش مستحملة الشمس. علشان كده، بينصح إن الأطفال يلبسوا ملابس قطنية وبأكمام وجيبات طويلة لتحقيق التغطية الأكبر لجلدهم.
- اشتري قبعة
رغم إن المعتاد إن الأمهات يشتروها للبنات ويجيبوا للولاد كاب. بس الهدف الأساسي من القبعة هو توفير التغطية لفروة الرأس والرقبة والأذنين، وده اللي مش بيوفره الكاب.
- لبسيه نظارة شمس
رغم إن شكلهم بيكون لطبف جدًا ومحبب للقلب، وهم لابسين النظارة الشمس. بس حقيقي هي ضرورية ومهمة جدًا، لأن انتي كده بتحمي عين طفلك من الإصابة بعتمة عدسة العين في مستقبله.
- استخدمي واقي من الشمس:
يوميًا وكل مرة طفلك يخرج من البيت، لازم تحطي له كريم واقي للشمس مخصص للأطفال، بمعامل حماية مش أقل من 15. وده سهل جدًا تلاقيه في الصيدليات ومتوفر بأسعار معقولة. وكرري استخدامه كل ساعتين طالما طفلك لسه بره البيت.
لو عايزة تعرفي أنواع وأسعار الصن بلوك، دوسي هنا.
عمومًا طول ما طفلك بره وبيمارس أي نشاط بيتعرض فيه للشمس. لازم كريم واقي للشمس يكون معاكي وتحطيه لطفلك كل ساعتين. لما تيجي تختاريه، اتأكدي من إن مكوناته تناسب سن طفلك. وقبل استخدام أي منتج للبشرة، لازم تعملي له اختبار حساسية تجنبا لأي ضرر على بشرته. بس خلي بالك، استخدام طفلك لوقاية الشمس مش رخصة ليا إنه يفضل قاعد معرض نفسه لها. كريم واقي الشمس وسيلة من وسائل الحماية ولازم تاخدي باقي إجراءات الحماية.
