محتويات المقال
الفيلر والبوتكس من أكتر المصطلحات المتداولة في عالم التجميل غير الجراحي. كتير جدًا بنسمع الاسمين دول لكن قليل مننا يعرف الفرق بينهم، وفيه ناس بتفتكرهم حاجة واحدة. وفيه مجموعة تانية فكراه مجرد اسم جديد لنفس طريقة العلاج. علشان كده، هنعرف هنا إيه الفرق بين البوتكس Botox والفيلر dermal fillers.
الشبه بين الفيلر والبوتكس
الاتنين نوع من أنواع العلاجات التجميلية اللي بتتم عن طريق حقن مواد معينة في طبقات الجلد القريبة من السطح في العيادات التجميلية على يد متخصصين من الخبراء أو أطباء بدون استخدام مشرط جراحي. هنا، بينتهي التشابه بينهم ويبتدي الاختلاف.
الفروق بين الفيلر والبوتكس
- البوتكس Botox بيحتوي على نوع من البكتيريا النقية بتعمل على شل العضلات. ومن خلال الإجراء ده، بيحصل تخفيف للتجاعيد والخطوط التعبيرية في الوجه.
- الفيلر dermal fillers اللي ترجمتها الحرفية “الحشوات الجلدية” مواد دورها هو ملئ الأماكن اللي أصبح سمكها أقل بسبب عوامل السن والشيخوخة. وأكتر أماكن اللي بتستخدم فيها هي منطقة الخدين والشفاه والفم.
دي الفروق العامة لكن كملي علشان تعرفي تفاصيل الاختلافات
إيه هو البوتكس Botox؟
هو عبارة عن شكل نقي من مادة توكسين البوتولينوم وبيحصلوا عليها من نوع من البكتيريا النافعة. ورغم إن الكميات الكبيرة منها سامة وقاتلة، الكميات الصغيرة المحسوبة التجميلية آمنة.
البوتكس بيشتغل عن طريق وقف الإشارات العصبية بين العضلات في أماكن حقنه، فالعضلات دي بتتجمد بشكل مؤقت وده بيساعد على تخفيف التجاعيد أو تقليلها أو إخفائها.
البوتكس مش بيستخدم في كل الوجه، لكن فقط في العضلات المتحركة في وشنا لأنها المسببة للخطوط التعبيرية في الوجه. وأكتر العضلات دي موجودة في المنطقة بين الحاجبين، الخطوط الأفقية على الجبين، والخطوط الرفيعة حول العين.
لكن البوتكس ما ينفعش مع الوجه اللي ترهل أو بعد فقدان السمنة لأن الخطوط فيه بتتسمى خطوط ثابتة. ده غير إن البوتكس علاج مؤقت بيحتاج تكرريه لو عايزة تحافظي على نفس النتيجة. العضلات المحقونة بوتكس بترجع تاني لطبيعتها بعد فترة بتتراوح من 3 لـ 4 شهور
في الآخر، لازم تتعاملي مع الوسيلة دي بشكل واقعي: يعني اتكلمي مع طبيبك عن سقف التوقعات لعملية تجميل غير جراحية زي البوتكس والأعراض الجانبية اللي ممكن تظهر حتى لو قليلة.
إيه هو الفيلر dermal fillers؟
زي ما يبان من اسمه، وظيفته هي حشو الأنسجة الجلدية الرخوة اللي سمكها قل من عوامل مختلفة. ولكل نوع وظيفة معينة، مش زي البوتكس اللي بيتحقن في العضلات وبس، الفيلر فيه تنوع والعلاج بالفيلر بتختلف مدة استمراريته لمدة تتراوح ما بين 6 شهور وسنتين.
فوائد الفيلر
- ملو الشفاه الرقيقة
- تعزيز وزيادة حجم الأماكن الرفيعة في الوجه.
- إنقاص أو إزالة التجاعيد تحت العين.
- تخفيف أثر الندوب والجروح.
- ملو التجاعيد الثابتة أو تنعيمها، خاصةً في الجانب السفلي للوجه اللي بتظهر عادة من نقص الكولاجين في البشرة.
اعرفي من هنا إزاي تعملي سكراب في البيت
البوتكس بيستمر من 3 لـ 4 شهور، والفيلر من 6 شهور لسنتين. وتقدري تستخدمي الاتنين في وقت واحد لأن كل واحدة فيهم ليها طبيعة مختلفة عن التانية ومافيش تعارض بينهم. يعني تستخدمي البوتكس للتخلص من تجاعيد الجبهة، وفي نفس الوقت تزيدي من حجم الشفاه.
عمومًا، لازم تطلبي من طبيبك إنه يوضح لك كافة المخاطر اللي ممكن تحصل معاكي في حالة استخدام النوع ده من العلاجات. وتعرفيه إذا كان فيه أي نوع من الأدوية بتستخدميه بانتظام. وخدي بالك، النوع ده من العلاجات ممنوع تمامًا على الحوامل والمرضعات.
وآخر وأهم نقطة: خلّي سقف توقعاتك دايمًا واقعي.
