اعملي بنفسك: صلصال لولادك في البيت

قعدة الولاد في البيت حاليًا بسبب تعطيل المدارس عشان منع نشر عدوى فيروس كورونا أكيد بتخلي الولاد زهقانين جدًا، هنا هييجي دورنا كأمهات إننا نحاول نهون ونخلي قعدتهم في البيت ظريفة على قدر الإمكان. وعشان لقينا سؤال بيتكرر على جروب راحة بالي إزاي نعمل صلصال في البيت في الموضوع ده هنقولك طرق بسيطة أوي عشان تعمليه بنفسك في البيت من مكونات طبيعية موجودة في مطبخك ومش مكلفة خالص.

 

الصلصال لعبة مفضلة للأطفال وخصوصًا الأطفال اللي سنهم صغير عشان يعتبر من الألعاب الحسية اللي بتخليهم يستكشفوا وبتقوي عضلات ايدهم وكمان بتشغلهم لساعات، بس الصلصال اللي بيتباع فى المكتبات ومحلات اللعب ممكن يبقى سام عشان ممكن الأطفال تحطه في بقهم وكمان بيكون مكلف وبينشف بسرعة، عشان كده الصلصال المنزلي آمن ودي الوصفات السريعة اللي ممكن تعمليها بسهولة

 

 

الوصفة الأولى

 

• المكونات

½ كوباية دقيق

½ كوباية ملح

¼ كوباية ميه

ألوان طعام صحية

 

• الطريقة

هتحطي المكونات الجافة مع بعض وتخلطيهم وبعدين تحطي كوباية الميه براحة وتعجني لحد ما توصلي لقوام مناسب أشبه بالعجينة وتضيفي الألوان اللي حابة تحطيها.. لو عايزة تعملي كذا لون ممكن تقسمي العجينة كور وتضيفي ألوان الطعام لكل كورة منهم.

 

 

 

الوصفة التانية

 

• المكونات

½ كوباية نشا

كوباية من البيكينج صودا

¾ كوباية ميه

ألوان طعام صحية

شوية فانيليا سايلة أو 2-3 نقطة زيت عطري عشان يدي ريحة حلوة.

 

• الطريقة

هتحطي النشا والبيكينج صودا والميه في حلة وتقلبيهم وبعدين تحطيعم على نار متوسطة وتطفي على النار لما تلاقي القوام مسك وبقى شبه العجين.. طلعيه من الحلة وحطيه على ورق زبدة سيبيه يبرد وبعدين شكليه وضيفي الزيت العطري أو الفانيليا ولون الطعام واعجنيه عشان اللون والزيت أو الفانيليا يتوزعوا.

 

الوصفة التالتة

 

• المكونات

كوباية دقيق

½ كوباية ملح

معلقة كبيرة زيت

ألوان طعام

 

• الطريقة

هتحطي كل المكونات مع بعض ما عدا ألوان الطعام في حلة على نار هادية وتفضلي تقلبي لحد ما توصلي للقوام اللي تحبيه وتطلعيه تحطيه على ورق زبدة وبعد ما يبرد هتعجنيه مع ألوان الطعام.

 

 

شوية نصايح

• ممكن تستخدمي قطاعات البسكوت البلاستيك عشان ابنك أو بنتك يقدروا يعملوا أشكال بيهم.
• عشان تحفظي الصلصال ممكن تلفيه بالبلاستيك الشفاف (الكلينج فيلم Quilling film) أو في أكياس بلاستيك أو علب محكمة عشان مينشفش.
• ممكن تحفظي الصلصال في التلاجة عشان ميبوظش وتطلعيه قبلها قبل ما ابنك يستخدمه بساعتين بس يفضل ان الصلصال اللي هتعمليه في البيت ميقعدش أكتر من 3 أيام.
• لو ابنك أقل من 3 سنين حاولي تفهميه ان الصلصال ده للعب مش بيتاكل يوفضل انك تديله الصلصال يلعب بيه تحت إشرافك حتى لو عملاه كله من مكونات طبيعية عشان ميكلوش كله.

 

بنتمنى ان المقال يكون عجبك ولو جربتي وصفة من وصفات عمل الصلصال عرفينا انهي طريقة عجبتك.