المعقمات والمطهرات للأطفال: ممكن استخدم مطهر اليدين لطفلي؟

مع تزايد احتمالات تعرض العالم لموجة جديدة من فيروس كورونا احنا بقينا خلاص متعودين على الاحتياطات الوقائية زي لبس الكمامة وتعقيم الإيدين طول الوقت بس في أمهات كتير لسه بتسأل : هل الأطفال محتاجين يستعملوا المطهر لإيديهم هما كمان ؟

في أنواع معقمات مختلفة مناسبة لاستخدام الأطفال خاصة إنهم هما الفئة الأكثر حركة واللي ممكن تشيل حاجات كتير غير معقمة ومن أهم المعقمات دي اللي هنتكلم عنها.

 

أهم المعقمات والمطهرت للأطفال

 

• المياه والصابون

دا المطهر الأفضل والأسهل للكبار والصغيرين، حاولي تغسلي إيد ابنك باستمرار كل ما تيجي فرصة لده.

 

• المناديل المبللة

المناديل المبللة مش أحسن حاجة لتطهير إيدين الأطفال لأن الطفل كتير جدا ممكن يمص المنديل ده ويبلع الكحول وفيه أنواع منها:

1.  مناديل مطهرة فيها مواد زي الكلور دي بتكون مصممة لتعقيم الأسطح مش إيدين الأولاد أبدا.
2.  مناديل غير فعالة في القضاء على الجراثيم .
3. مناديل مبللة بتسبب تهيج الجلد أو حتى جفافه.

 

• مطهرات تحتوي  على الكحول بنسبة 60-70% سائل أو جل

المطهرات دي كويسة في استعمالها للأطفال وخاصة بره البيت أو في مكان مفيهوش ميه وصابون بس في احتياطات لازم الأم تاخد بالها منها زي:

1. تستخدم كمية صغيرة على إيد الطفل.
2. تفرك المطهر كويس لغاية ما ينشف ولازم نتأكد كويس انه نشف عشان الطفل ما يبلعش أي مقدار منه.
3. نحفظ زجاجة المطهر بعيد عن إيد الأطفال.

 

• الزيوت الأساسية

في علامات تجارية معتمدة على زيوت طبيعية بس زي زيت الزعتر أو الليمون عشان تقتل الجراثيم بس المشكلة إن الزيوت دي بتهيج الجلد في أوقات كتير فبلاش نستخدمها للأطفال.

 

• مطهر الإيدين الخالي من الكحول

بعض المطهرات بتستخدم مادة كلوريد البنزالكونيوم ودا بيفضل وقت أطول من الكحول وبيكون مناسب للمستشفيات أكتر من الاستخدام العادي وللأسف بيسبب تهيج البشرة والعين وممكن يبقى غير مقاوم للبكتيريا.

 

 

نصايح مهمة لاستخدام المطهرات للأطفال:

1. لو ابنك لعق شوية مطهر ما تتخضيش فطبقا لخبراء مكافحة السموم الحاجات دي نادر لما تكون ضارة بس امسحي فمه وخليه يشرب شوية ميه .
2. لو طفلك عيونه بقى شكلها نعسان أو متهيجة أو كنتي شاكة إنه ممكن يكون بلع معلقة مطهر أو أكتر اتصلي بمركز مكافحة السموم القريب منك أو روحي الطواريء فورا.
3. ابعدي عن الحاجات اللي فيها روايح جذابة أو أصباغ أو لمعان لأن الحاجات دي غير ان فيها مواد كيميائية ممكن تكون سامة هي كمان ممكن تبقى مغرية للأطفال باللعق والبلع.

 

 

المصادر:
babycenter.-