مسلسل بـ100 وش قالب فيسبوك السنة دي في رمضان. ناس كتير قوي بتتفرج عليه ومركزين مع الأحداث وقاعدين على أعصابهم ولّا كأنهم هيقسموا فلوس سرقة البنك معاهم. الستات بقى من ساعة عرض أول حلقة وهمّ مش قادرين ما يِظهروش إعجابهم وجنونهم بشخصية “عمر” اللي بيلعبها آسر ياسين والحقيقة إن دي مش حاجة غريبة خالص لأن الشخصية لازم تتحب لأكتر من سبب.
5 أسباب تخلي عمر الكراش المثالي
بـ100 وش – مسلسلات رمضان 2020
- sugar: الكلمة دي محتاجين نسمعها 3 مرات قبل الأكل وبعده.
- إتقانه للهجات متعددة ولا كأنه سفير: عمر مش راحمنا، ما كفّاهوش bye sugar وhey sugar، من أول أغنية التتر ولحد مشاهدة كتيرة أوي في المسلسل عمال يرمي لنا كلام إنجليزي وفرنساوي وكل رمية في الجون بصراحة.
- أشيك واد في الزمالك: من أول ساعته الرولكس لحد كل حاجة بيلبسها يجننوا.
- دماغ ألماظات: لو هم عندهم البروفيسور، احنا عندنا البرنس! عمر بيثبت لنا ذكاءه وتفانيه في العمل من قبل عملية السرقة. عمر كان بيعمل عمليات نصب صغيرة، كان بياخد فيديوهات من مواقع إباحية، وبيغير صوته لامرأة لعوب وبيصطاد بيها رجالة عن طريق الإنترنت بعد اختيارهم بدقة وجمع معلومات عنهم. وبعد تصويرهم في أوضاع مخلة بيبتزهم، ويطلب منهم فلوس. حقيقي الشكل مش كل حاجة، طموح الراجل مهم قوي وده اللي خلّاه ينجح في التخطيط لسرقة البنك.
- كريمة الكريمة: عمر ارستقراطي حتى وهو بينصب، بينصب عشان يدفع اشتراك نادي الجزيرة ويجيب لمامته جمبري.
كل ده جميل أوي لكن كلنا عارفين إن الكراش بيفضل حلم في الخيال و الحقيقة حاجة تانية خالص. الحقيقة “سباعي” أو “سبعبع” عضو تاني من أعضاء العصابة بس بالعصابة كلها! شخصية “سباعي” اللي بيلعبها شريف دسوقي، شخصية علقت معانا من أول ظهورها وما قدرناش ما نحبهاش بس حب تاني مختلف عن حب “عمر”، زى حبك لأبو العيال كده.
5 أسباب تخلي سباعي هو الحب الحقيقي
مسلسل ب 100 وش – مسلسلات رمضان 2020
- بيتصرف تصرقات غير منطقية في أوقات عصيبة: زى مثلًا إنه يغسل وشه في نص عملية السرقة وهو عارف إنه حاطط ماكياج للتخفي.
- عنده قدرة ينام في أصعب الظروف: العصابة كلها سهرانة وقاعدة تفكر ينجحه الخطة ازاي وهو في سابع نومة.
- ما بيعرفش يكدب ولا يمثل: أول ما واحد عرفه في البنك ماحاولش حتى يداري بما إنه متخفي.
- بيصرف فلوسه على حاجات تافهة: ربنا يهديك يا عم سباعي!
- مكافح وعنده إرادة: حاول يجتهد في دور المحامي عز الدين أيبك لأنه مصر يحقق حلمه في التمثيل رغم فشله في فيلم مافيا بدورين.
وبرغم كل حاجة بنحبك يا سبعبع!
