من أكتر الأمور المزعجة موضوع القشرة. مش بس بتحسسنا إن شعرنا في حالة سيئة. لكن كمان أوقات بتعرضنا لمواقف محرجة. علشان كده، في المقال ده، جبنا لك أفضل طرق للتخلص من الكابوس ده. بس خلينا نعرف الأول إيه هي قشرة الشعر دي؟
القشرة عبارة عن حالة بتصيب فروة الراس وبتسبب حكة وتقشر في طبقة الجلد وبقع دهنية. ومسببات القشرة كتير ومنها:
مسببات قشرة الشعر
- التهاب الجلد الدهني.
- الجلد الجاف.
- الحساسية من بعض منتجات الشعر والجلد.
- بعض الأمراض الجلدية زي الإكزيما والصدفية.
- الدايت.
- زيادة نمو نوع من أنواع الفطريات اللي شبه الخميرة اسمه Malassezia.
وعمومًا متوفر في الصيدليات وحتى السوبر ماركت منتجات عديدة لمقاومة القشرة. بس في نفس الوقت، فيه طرق طبيعية سهلة وتقدري تعمليها في البيت تقدر تخلصك من المشكلة دي. هنستعرض بعضها في المقال ده.
طرق طبيعية للتخلص من قشرة الشعر
- زيت شجرة الشاي:
من زمان جدًا بيتم استخدام الزيت ده في علاج مشاكل صحية عديدة زي حب الشباب والتهابات الجلد. المميز في الزيت ده مركب اسمه terpinen-4-ol اللي له تأثير قوي وفعال فيما يخص مضاد البكتيريا وكل ما ارتفع نسبة المركب دا في الزيت، كل ما زادت قدرته على منع نمو الفطريات والبكتيريا على فروة الرأس.
بس مهم تعرفي إن استخدامك للزيت ده بشكل مباشر على فروة الراس ممكن يسبب التهاب أو طفح جلدي. علشان كده، أفضل طريقة لاستخدامه بتكون عن طريق وضع بعض القطرات منه على شامبو الشعر بتاعك علشان تستفيدي منه تمامًا.
- جيل الألوفيرا أو الصبار
الألوفيرا نوع من أنواع الصبار جاي من عيلة اسمها العصارية. بتتميز بوجود مضادات للأكسدة والأحماض الأمينية اللي لها قدرة على التقليل من قشرة الشعر.
الفحوص السريرية أثبتت إن جيل الألوفيرا له قدرة على ترطيب فروة الرأس والتئام الجروح اللي بتيجي نتيجة الحكة الشديدة وتقليل الالتهابات. بجانب إن له قدرة على وقف تكوّن قشرة الشعر. ودراسات تانية أثبتت إن لجيل الألوفيرا قدرة على علاج نوع من أنواع القشرة اللي اسمه التهاب الجلد الدهني.
أفضل 3 ماسكات للبشرة الدهنية سريعة المفعول
- الأسبرين:
زي ما هو معروف، الأسبرين واحد من المسكنات اللي بتستخدم لعلاج بعض أنواع الألم الخفيفة. بس الدراسات وجدت إنه بفضل احتواء الأسبرين على حمض الساليساليك وهو عنصر نشط ومستخدم في منتجات مقاومة القشرة إن استخدام الأسبرين بشكل خارجي هيفرق كتير في مقاومة القشرة. حمض الساليساليك له قدرة على إزالة القشور اللي بتتكون في الشعر من القشرة وتقليل التهاب فروة الرأس.
أفضل طريقة لاستخدام الأسبرين هي إنك تطحني حبتين أو تلاتة بشكل ناعم وتخلطيها مع مقدار غطا من شامبو الشعر وتغسلي شعرك به. مع التكرار، هتلاقي فرق وتحسن كبير.
- صودا الخبز:
صودا الخبز هي نفسها بيكربونات الصوديوم. الأبحاث بتقول إن لها قدرة تقليل القشرة عن طريق استخدامها بشكل مباشر وكمان تقدر تقلل الالتهابات اللي بتصيب فروة الراس. صودا الخبز لها خصائص لمقاومة الفطريات المسؤولة عن الإصابة بقشرة الشعر. مهم إنك تحطي في الاعتبار إن صودا الخبز لها خصائص حمضية وإن كتر استخدامها ممكن يسبب جفاف في الشعر ويجرده من زيوته الطبيعية. علشان كده، مهم جدًا الاعتدال في استخدامها.
- زيت جوز الهند:
استخدام زيت جوز الهند ممكن يساعد في تقليل القشرة وتخفيف التهابات فروة الرأس. الحلو في زيت جوز الهند هو سهولة استخدامه عن طريق وضعه قبل غسيل الشعر. هيساعد على ترطيبه وتقليل القشرة بشكل ملحوظ مع التكرار.
ونصيحة أخيرة: حاولي تقللي من حجم الضغوط في حياتك لأن لها تأثير على انتشار القشرة في شعرك. وبعض العلماء بينصحوا بوقف استخدام منتجات الألبان خلال فترة العلاج من قشرة الشعر لأن لها تأثير قوي عليها.
