محتويات المقال
صنية الكنافة من أشهر حلويات رمضان بكل أشكالها، الكنافة بالكريمة ، بالمكسرات، بالقشطة والمانجة. يا سلام .. يا محلاها صينية الكنافة البيتي المعمولة بحب وريحتها بتملى البيت وهي بتتخبز، وصوت الشربات البارد لما ينزل عليها وهي طالعة من الفرن سخنة، وتبدأي تسمعي صوت تششش كده هادي ولذيذ وتتفرجي على الكنافة وهي بتتشرب الشربات حبة حبة. أنا باحس إن عمل الكنافة في البيت في رمضان متعة ما بعدها متعة. ومع احترامي لكل محلات الحلويات وكل الابتكارات والاختراعات اللي بتتقدم في رمضان، هتفضل صينية الكنافة البيتي هي الأصل.
والنهارده هنقولك طريقة عمل الكنافة بالكريمة اللي كتير بيفضلوها عن الكنافة بالمكسرات لإنها بتكون طرية. حابة أوضح لكم نقطة مهمة وهي إن الكنافة بالكريمة اللي بناكلها في المحلات ما بيكونش فيها كريمة! أمال بتكون محشية إيه يا ترى؟ بتكون معمولة بما يسميه الحلواني “قشطة كريم” ودي بتكون عبارة عن مهلبية ومضاف لها قشطة فبتبقى ناعمة ودسمة زي الكريمة. والنهاردة هنقول لك إزاي تعملي القشطة كريم وتحشي بيها الكنافة وتعملي أعظم صينية كنافة بالكريمة، جربيها وصوريها وشاركينا إبداعاتك.
طريقة عمل شربات الكنافة بالكريمة
مقادير شربات الكنافة
- 2 كوب سكر
- 1 ونص كوب مياه
- 1/2 ليمونة
- 1 باكيت فانيليا (تقدري تنكّهي الشربات بعود قرفة أو مياه ورد أو زهر أو قشور برتقان أو أعواد قرنفل)
طريقة عمل شربات الكنافة
- في حلة على النار، ضيفي السكر والمياه وما تقلبيهمش نهائي لحد ما يبدأ السكر يدوب تدريجيًا والشربات يبدأ يغلي بقوة.
- سيبي الشربات يغلي 5 دقايق على الأقل وضيفي عصير الليمون والفانيليا وقلبيهم واطفي النار.
- سيبي الشربات يبرد قبل صبه على الكنافة.
طريقة عمل القشطة كريم
المقادير
- 1/2 كيلو لبن حليب كامل الدسم
- 50 جم لبن بارد لوحده
- 50 جم نشا
- 150 جم قشطة بلدي طازة
- 1 معلقة كبيرة سكر
- 1 كيس فانيليا
خطوات عمل القشطة كريم:
- ذوبي 50 جم النشا مع 50 جم اللبن البارد كويس في بولة وسيبيها على جنب.
- ارفعي على النار نص كيلو الحليب لحد ما يقرب يغلي وضيفي النشا المذوب باللبن ومعلقة السكر وقلبي كويس قوي باستخدام مضرب سلك لحد ما يتخن القوام.
- ارفعي المهلبية من على النار وضيفي الفانيليا وقلبيها كويس وسيبيها تبرد شوية وبعدين ضيفي القشطة البلدي وقلبي لحد ما تتجانس.
- برديها تمامًا وبكده تكون جاهزة للحشو.
طريقة عمل الكنافة بالكريمة
مقادير الكنافة:
- 1/2 ك كنافة
- الشربات السابق إعداده ويكون بارد
- القشطة كريم السابق إعدادها وتكون باردة
- سمنة سايحة حسب الحاجة
طريقة عمل الكنافة بالكريمة:
- اضربي الكنافة في محضرة الطعام أو افركيها بإيدك وكسريها لقطع صغيرة.
- افركي الكنافة بكمية وفيرة جدًا من السمنة السايحة لحد ما تتشبع تمامًا.
- ادهني الصينية بالسمنة وافردي نص كمية الكنافة واكبسيها كويس قوي بإيدك أو باستعمال صينية تانية أصغر شوية.
- افردي طبقة القشطة كريم وسيبي مسافة بسيطة من جوانب الصينية من غير ما توصلي لها الكريمة.
- افردي الطبقة التانية من الكنافة فوق الكريمة بحرص، وثبتي الطبقتين في بعض كويس من الحواف واضغطي بخفة وحرص لتسوية السطح.
- اخبزي الكنافة في الفرن المتسخن على حرارة 200 لحد ما الجوانب تبدأ تحمر.
- اقلبي الكنافة على الوش التاني عشان تتحمر من كل الجهات أو ولعي الشواية.
- بعد خروج الكنافة من الفرن مباشرة، اسقيها بالشربات البارد وقدميها دافية وبألف هنا.
لو بتحبي البسبوسة كمان ممكن تشوفي هنا طريقة عمل البسبوسة بالقشطة من منال العالم
