سواءً هيتاكل كغموس مع المقبلات المقلية المتنوعة، أو يضاف على ساندويتش برجر بيتي لذيذ، أو حتى يكون إضافة لوصفة تانية زي الماك آند شيز مثلًا، صوص الجبنة واحد من ألذ وأطعم الصوصات الدسمة الغنية اللي بقت محبوبة جدًا وخصوصًا من عشاق الأجبان.
لمحبي الأجبان: اتعرفي على أنواع الأجبان المختلفة بالصور
في مقولة كده بتقول: “مفيش حاجة اسمها جبنة كتير!” يعني كل ما نزود جبنة، يكون أحسن وأحلى وأطعم بالتأكيد! الميزة في إنك تحضري صوص الجبنة في البيت هي إنك تقدري تتحكمي في أنواع الجبنة اللي تحبي تضيفيها جوه الصوص براحتك، أي نوع جبنة ممكن تسيح، تقدري تستخدميها زي مثلًا: الشيدر بأنواعها، الجودة، أو حتى الموتزاريلا. تقدري كمان تضيفي شوية من الجبنة البارميزان مع أي نوع تاني من الأجبان الصفراء اللي بتسيح كويس لإنها لوحدها مش هتدي القوام المطلوب.
أهم حاجة عشان تظبطي صوص الجبنة هي إنك تضيفي المكونات بالتدريج وتخلطي كويس جدًا، اللبن ضيفيه بالتدريج، وكمان الجبنة المبشورة ضيفيها تدريجيًا، واخلطي كويس قوي بعد كل إضافة عشان تضمني صوص ناعم جدًا وقوامه رائع.
طريقة عمل صوص الجبنة:
المقادير
- 2 معلقة كبيرة زبدة.
- 2 معلقة كبيرة دقيق أبيض.
- 1 و1/2 كوب حليب كامل الدسم.
- 1 و1/2 كوب من الجبنة المبشورة (استخدمي النوع المفضل ليكي أو أكتر من نوع).
- 1/4 معلقة صغيرة فلفل أسود.
- 1/4 معلقة صغيرة بودرة التوم.
طريقة العمل
- في حلة على النار، ضيفي الزبدة والدقيق. وقلبي الدقيق كويس على نار هادية لحد ما تشمي ريحة تحميص الدقيق.
- ضيفي اللبن بالتدريج مع التقليب المستمر، باستخدام مضرب سلك عشان ما يحصلش أي تكتلات.
- ضيفي كمية الجبنة بالتدريج، وقلبي بعد كل إضافة لحد ما تسيح الجبنة تمامًا.
- ضيفي الفلفل الأسود وبودرة التوم، تقدري تضيفي كمان رشة من البابريكا أو جوزة الطيب لنكهة مميزة وكل دي إضافات اختيارية.
- قدمي صوص الجبنة ساخن.
- تقدري تحفظي صوص الجبنة لمدة يومين في التلاجة في علبة محكمة الغلق، ووقت الاستخدام عيدي تسخينه في الميكروويف.
- للحصول على لون برتقاني قليلًا للصوص يفضل استخدام جبنة الشيدر الحمراء
