محتويات المقال
التمر أو البلح.. أول حاجة بتيجي في دماغنا لما بنسمع اسمه رمضان. بس حقيقي احنا بنحرم نفسنا من واحد من أفضل أنواع الغذاء الموجود في العالم كله لما نحصر فترة أكله بانتظام في شهر رمضان بس. التمر دونًا عن أي نوع من أنواع الأكل في العالم والتاريخ هو اسمه super food وده بناءً على تصنيف منظمة الغذاء العالمي. يمكن علشان مافيش أي نوع أكل يقدر يوفر لك فوائد التمر. ما اقتنعتيش؟ أنا هاقنعك.
فعليًا مافيش أي حالة جسدية أو صحية التمر ما ينفعش معاها. حتى لو انتي قلتي أنا مش بحب التمر، أحب أقول لك إن كلمة تمر دي لوحدها بلا أدنى مبالغة بيندرج تحتها مئات الأنواع من التمر بمختلف الفوائد وحتى الأطعمة. بس أنا هاكلمك عن الأنواع العادية المتوفرة في الأسواق طول السنة. أنا عن نفسي بحب أحفظه سواء مجفف أو رطب (طري شوية) في الفريزر. بيخليه عايش معايا طول السنة وبيمنع إنه يسوس. بجانب إني لما أحس إن عندي رغبة في أكل حاجة حلوة، باعتبره بديل صحي وأمن جدا عن لو طلبت أي صنف حلويات مصنع مجهول المصدر
فوائد التمر
صعب قوي بصراحة إني أحصر لك كل فوائد التمر. بس هحاول أوصل لك أشهر الفوائد دي اللي هتنفع كل أفراد أسرتك وهتخليكي حريصة دايمًا إنه يكون موجود في تلاجتك. فتعالي نتعرف على فوائد البلح دي بشكل مختصر:
-
فوائد البلح لصحة العظام وقوتها:
من مميزات التمر إنه بيحتوي على كمية من الفيتامينات والمعادن الصحية اللي وجودها أساسي في تكوين العظام الصحية والحفاظ عليها وعلى قوتها خصوصًا لأصحاب السن الكبير وأمراض الشيخوخة. ده لأنه بيحتوي على المنجنيز والنحاس والماغنسيوم واللي بدورهم بيحموا ويكونوا العظم وبيحموا من التهاب المفاصل.
-
بيعزز من صحة الجهاز الهضمي:
من مميزات التمر إنه غني بالألياف الصحية وخصوصًا نوع اسمه الألياف القابلة للذوبان في المياه اللي تعتبر واحدة من أفضل أنواع علاج الإمساك. وفي نفس الوقت بيحتوي على نوع تاني من الألياف غير قابل للذوبان في المياه وده دوره إنه قادر على تنضيف الجهاز الهضمي من أول المعدة لحد القولون بأفضل ما يكون. لدرجة إن بعض المختصين بيعتبروا تناول التمر على الريق من أفضل الأغذية المقاومة لالتهاب القولون والسرطان والبواسير. علشان كده، في أي وقت جالك إمساك أو التهاب في القولون، استخدمي التمر كعنصر أساسي في نظامك الغذائي أو ممكن تعودي نفسك كل يوم تاكلي التمر على الريق. هتحسّي بفرق عظيم مع الالتزام طبعًا بالوصفة الدوائية اللي الطبيب محددها.
-
فوائد التمر لصحة القلب:
من العناصر الغذائية اللي موجودة بكثافة في التمر هو عنصر البوتاسيوم اللي بيقدر يحافظ على صحة القلب والشرايين وعلى حمايتها من ارتفاع ضغط الدم وبالتالي الحماية من الإصابة بسكتات قلبية أو دماغية. بجانب قدرة البلح على تخفيض معدل الكوليسترول الضار في الدم وده بيعزز صحة القلب بشكل كبير جدًا. علشان كده بينصح بتناول التمر على الأقل مرتين في الأسبوع لحماية القلب والشرايين.
-
التمر مضاد للالتهابات:
التمر غني بالماغنسيوم واللي معروف بقدرته العالية على مقاومة الالتهابات سواءً في العظم أو المفاصل أو حتى التهاب الأعصاب. لدرجة إن الأبحاث أثبتت إن له تأثير إيجابي جدًا على التقليل من آثار مرض الزهايمر.
-
فوائد البلح في تخفيض ضغط الدم:
البلح غني جدًا زي ما قلت لك بالماغنسيوم كمان البوتاسيوم واللي لهم أثر فعال ومثبت في تخفيض ضغط الدم وحماية الشرايين ومنع تكوّن الجلطات. لدرجة إن الانتظام في تناول التمر وجد إنه بيخفض خطر الإصابة بسكتات قلبية لحد 9%.
-
فوائد التمر للحامل:
الباحثين في جامعة العلوم والتكنولوجيا University of Science and Technology لقوا إن تناول السيدات الحوامل في الشهر الأخير وخلال الشهر التالي للولادة كان له أثر إيجابي جدًا على صحة الأم. فالأمهات اللي انتظموا في تناول التمر خلال الشهر التاسع كان الرحم عندهم مستعد للولادة من غير أي محفزات طلق صناعي أفضل من الأمهات غير المنتظمة في أكل التمر. وحتى بعد الولادة كان التمر له دور فعال في استعادة الأم لصحتها وإدرار اللبن وعودة الرحم لوضعه الطبيعي.
-
التمر يرفع معدلات طاقة الجسم:
احنا في العادي بتاعنا متعودين على أكل التمر بعد الصيام علشان قدرته على رفع معدلات السكر في الدم بشكل بطيء وفي نفس الوقت صحي. لأن المحتوى الحراري للتمر على الرغم من إنه عالي بسبب السكر والكربوهيدرات اللي موجود فيه إلا إن الجلسيمك إندكس GI بتاعه منخفض. علشان كده، يعتبر من أفضل الأغذية بعد الصيام وبرضه من الأطعمة اللي بينصح بتناولها قبل دخول الجيم زي الموز علشان تساعد على ارتفاع معدل الطاقة والحرق في الجسم.
-
التمر علاج لفقر الدم:
فقر الدم مرتبط بشكل مباشر مع انخفاض كرات الدم الحمراء بسبب انخفاض معدلات الحديد في الدم. علشان كده، وبما إن التمر واحدة من أغنى الأغذية بعنصر الحديد، يعتبر أفضل علاج منزلي مقاوم لفقر الدم والانتظام في تناول التمر بيساهم في مقاومة الأنيميا بشكل فعال ومش بس لعلاج فقر الدم لكن كمان للحفاظ على حيوية باقي أعضاء الجسم.
-
فوائد التمر للرجيم:
أولًا: لازم نتفق على حاجة، كلمة رجيم مش مرتبطة بس بفقد الوزن، إنما كمان بزيادته والحفاظ عليه. كلمة رجيم في الأساس معناها نظام أكل صحي. علشان كدة من الجميل في التمر إنك ممكن تستخدميه بشكل معتدل بيخدم هدفك من اتباع النظام الغذائي يعني لو عايزة وزنك ينخفض، تقدري تدخلي التمر في الرجيم محسوب السعرات الحرارية وتاخديه كسناك مرة أو مرتين في الأسبوع. لكن لو عايزة تزوّدي وزنك، فانتي هتلجأي للتمر كمكون أساسي في أكلك كل يوم ولكن برضه بشكل معتدل. أما لو قررتي تحافظي على وزنك هتحتاجي ما تزوديش عدد تناول التمر عن تلات مرات خلال الأسبوع خصوصًا لو بتتبعي نظام رياضي.
-
فوائد التمر للبشرة والشعر:
التمر لأنه غني بفيتامينات أ وب والبروتين والكالسيوم. كل ده بيدعم ويعزز صحة الشعر والبشرة لأن الفيتامينات دي وجدوا إن قدرتها على حمل الأكسجين وتوصيله لكل أعضاء الجسم كبيرة جدًا. لدرجة إن المنتظمات في تناول التمر وجدوا فرق كبير في نضارة بشرتهم وزيادة طول الشعر وقوة الأظافر.
تفتكري بعد كل الفوائد دي هتقطعي التمر من بيتك؟ أنا عن نفسي باحس إن البيت مافيش فيه حاجة حلوة لو التمر خلص وبعتبره عنصر أساسي في أكلي موجود في تلاجتي دايمًا وبحبه جدًا مع قهوتي. قولي لي اقتنعتي ولا لسه؟
