الفازلين منتج موجود في بيوتنا كلنا تقريبًا، فوائد الفازلين كتير، ويمكن أكتر استخدام شائع له هو ترطيب البشرة في حالة جفافها، خصوصًا إن سعره في متناول الجميع ومتوفر في كل الصيدليات. بس على الرغم من كده، لازم تعرفي إن كلمة فازلين أصلًا اسم تجاري شائع، لكن اسم المادة الصح هو جل نفطي petroleum jelly.
علشان كده، خليكي حريصة إنك لما تيجي تشتريه تتأكدي إنه مكرر، وبالتالي نقي علشان تحمي نفسك من الشوائب البترولية اللي ممكن تكون مسرطنة. عمومًا الفازلين منتج بسيط يعنى مش علاج، هو فقط عامل مساعد، وتقدري تستخدميه بشكل معتدل مع العلاج الطبي الموصوف لك في حالة استخدامك له. واستخدماته كتير، تعالي أقول لك كام حاجة منها:
فوائد الفازلين
- واقي ممتاز للبشرة:
من مميزات الفازلين إنه بيدي أفضل فاعلية له مع البشرة الجافة. زي ما كلنا عارفين، البشرة الجافة بتكون أكتر أنواع البشرة المعرض للإصابة والتشقق وبالتالي العدوى. علشان كده، بيستخدم الفازلين كأفضل واقي لها، بمعنى إنه بيشكّل طبقة حماية بلا مسام على البشرة الجافة. لكن طبعًا ما تستخدميش الفازلين بدون تنضيف المكان الجاف. لإنك لو حطيتي الفازلين من غير عملية تنضيف أو تطهير بسيطة، بتكوني بتحبسي الجراثيم والعدوى في الجلد، وده بيسبب تدهور للحالة.
- مزيل لمكياج العين:
من مميزات الفازلين إنه مزيل ممتاز لمكياج العين خصوصًا المضاد للماء. مش بس كده، هو لما بيسهّل إزالة النوع ده من المكياج، مش بس بينضف كويس، هو كمان بيكون رقيق على بشرة العين، اللي بتكون رقيقة وقابلة للتهيج بسهولة. بس خلي بالك إنه ما يدخلش جوه عينيكي طبعًا.
لو عايزة تعرفي طرق إزالة المكياج بطرق طبيعية تانية، ادخلي هنا.
- مقشر طبيعي للشفاه:
لو حسيتي بجفاف في شفايفك، يبقى أسهل ماسك تقشير لها هو شوية فازلين مع سكر أو ملح. بس أهم حاجة يكونوا ناعمين. وباستخدام فرشاة أسنان ناعمة أو حتى صباعك، افركي بشكل دائري خفيف. هتلاقي الطبقة الجافة بتزول بسهولة. اشطفيها وحطي طبقة خفيفة من الفازلين، هتحسي بالفرق في لحظتها.
- منعم لكعب القدم:
احنا داخلين على الصيف خلاص، وده معناه موسم الصنادل. علشان كده، هتحتاجي تنتظمي في غسل أقدامك ودهنها بطبقة رقيقة من الفازلين قبل النوم، علشان تقدري تحصلي على مظهر كعب ناعم. وبرضه لما ترجعي من بره، لازم تعملي الروتين ده للحفاظ على نعومة رجلك من جفاف التراب.
- مانع للاحتكاك:
من الحاجات المسببة للألم وتهيج البشرة، لما يجي لك دور برد، هو الاحتكاك المستمر للمناديل الورقية لمنطقة الأنف، وده اللي بيخليها تحمَر وتتشقق وتزوّد وجع على وجعك. علشان كده، دهن طبقة رقيقة من الفازلين في منطقة الأنف بيقلل من احمرارها. وفي نفس الوقت، دهان طبقة من الفازلين على الجزء الداخلي من الفخد بيخفف من الاحتكاك وبالتالي الإصابة بالالتهابات المزعجة.
- بيساعد على زيادة عمر البرفان:
لو انتي من النوع اللي هاوي إن رائحة البرفان تستمر لوقت أطول على الجسم، ففيه طريقة سهلة جدًا باستخدام الفازلين. ادهني طبقة فازلين خفيفة عند منابت الرقبة وخلف الأذن والجزء الداخلي من الكوع. وبعد كده، رشي البرفان المفضل لكي وامزجيهم مع بعض. هتلاحظي إن الفازلين اكتسب الرائحة دي وساعد على استمرارها على جلدك وعدم تبخرها.
- ملمع أحذية:
من الحاجات الحلوة في استخدام الفازلين إنه عنده قدرة على إعادة اللمعان تاني للأحذية الجلدية الميؤوس منها. يعني لو جربتي تجيبي قطعة قماش قطن وتغمسيها في فازلين، ولمعتي حذاء جلدي عندك لونه بهتان، هتنبهري بالنتيجة. بس طبعًا ما تكتّريش كمية الفازلين. وبعد ما تخلصي، امسحي بقماشة قطن نضيفة.
جبت لك أكتر الاستخدامات غير الشائعة لكنها فعالة في نفس الوقت. على قد ما الفازلين له فوائد، بس لازم زي ما قلت لك، تتعاملي معاه على إنه عامل مساعد، لكن مش علاج في حد ذاته. وفي نفس الوقت، لو كنتي من أصحاب البشرة الدهنية، فخليكي حريصة في استخدامه على بشرتك علشان ممكن يجيب لك نتيجة سلبية وتلاقي حبوب على بشرتك.
