محتويات المقال
أحيانًا تغيير نظام الاكل بيكون سبب في تغيير الحالة النفسية والصحية، ويا حبذا لو كان النظام اللي هننتقل له بيخسس وكمان يحافظ على الصحة، وله أنصار حول العالم زي ميلي سايرس وبيونسه وباسم يوسف، مش بس بيتبعوه، لكن كمان بيحاولوا ينشروا ثقافته على قد ما يقدروا، ثقافة الـ Plant Based Diet PBD.
الفرق بين Vegetarian و Vegan و Plant-Based Diet
إيه هو نظام الـ Plant Based Diet
التلات حروف دول اختصار لـ ” النظام الغذائي المعتمد على النبات”. فيه ناس بتلجأ له بهدف فقدان الوزن لأنه فعال جدًا في خسارة الدهون، وفيه ناس بتلجأ له عشان تحمي صحتها من أمراض العصر زي السمنة والقلب والسكر والسرطان وغيرها من المشاكل المنتشرة بسبب نمط الحياة اللي عايشين بيه. لكن أيًا كان السبب اللي هيدفعك لاتباع النظام ده، فالأكيد إنه الناس اللي بتدعو لاتباعه بيتعاملوا معاه باعتباره أسلوب حياة مش دايت مؤقت، هيمشوا عليه شوية وبعدين يبطلوه. يعني لو أخدتي قرار إنك تجرب نظام الـ pbd. لازم تعرفي إنه مش مجرد دايت تمشي عليه شوية وبعدين تسيبيه شوية. ده أسلوب حياة، أحسن حاجة فيه إنك تاكلي كل اللي تقدري عليه من الخضار، وتكملي بالنشويات، وما تستغنيش عن الفاكهة، لأن فيها فوايد كتير لكن ما تبالغيش فيها.
الأكل المسموح في نظام الـ pbd
ناس كتير بتتصور إن النظام عشان اسمه فيه كلمة نبات، فاللي هيمشي عليه هيعيش على السلطة بس وده مش حقيقي. النظام ده بيشمل مجموعة ضخمة من المسموحات زي النشويات ومنها الرز والفريك والدرة والبطاطس والمكرونة البني والكينوا والشوفان والبرغل وغيرهم. وكمان بيسمح بالبقوليات زي الفول والعدس والفاصوليا واللوبيا والحمص والترمس والبسلة، والمكسرات بأنواعها بس شرط ما تكونش مملحة والمشروبات كلها ما عدا القهوة والتوابل كلها وطبعًا مش محتاجين نقول إن الفاكهة والخضار مسموح تاكل منهم بأي كمية وهم أساس النظام.
ممنوعات الـ pbd
الممنوعات في نظام الـ pbd مالهاش علاقة بأي أسباب دينية أو موقف معين من الطبيعة، الفكرة كلها لها علاقة بالصحة، والنظام بيعتبر إن المنتجات الحيوانية بجميع أنواعها زي لحوم الحيوانات والطيور وكائنات البحر والجبن والبيض واللبن والدهون الحيوانية غلط على الصحة. كذلك من ممنوعات النظام ده الدهون المشبعة، حتى لو كان مصدرها نباتي، لأن زي ما قلنا فلسفة النظام لها علاقة بالصحة في المقام الأول، وكمان من الممنوعات الأكل المعلب والمركز زي العسل والدبس ومرقة الدجاج والمحسنات يعني باختصار أي حاجة بتيجي في علبة. أما أكبر عدوين وأكتر حاجتين صعبين جدًا في النظام ده هم السكر والملح، ممنوعين تمامًا وفي بعض الأحيان بيتم استثناء الملح بطريقة معينة يعني بيتم منعه بنسبة 80 او 90% وبيسمح برشة خفيفة جدًا لكن طبعًا الأحسن الأكل يكون من غيره تمامًا.
