الأطفال ممكن يقضوا ساعات بيلفوا صوابعهم على شعر أمهاتهم ويشدوا بقوة. خصوصًا وقت الرضاعة أو النوم. مش كده وبس، ده أي محاولة لمنعه من شد الشعر وتقطعيه بتتقابل بحالة من الانهيار كأننا أذيناه بجد! الموضوع في الأول بيكون مقبول من الأم، باعتباره بيبي ومش فاهم وما دام بيرتاح وينام فتمام. لكن الموضوع مش بيكون بسيط لما البيبي بيكبر شوية. عضلات إيده بتكون أقوى والكمية اللي بيمسكها من شعرنا بتكون أكتر، والشد بيكون أعنف وأصعب. المسألة بتتحول لتعذيب متعمد.
ليه بيعملوا كده؟
السبب الأول إنهم بالطريقة دي بيكتشفوا حاسة اللمس عندهم، لكن بطريقة عملية، الملمس المختلف للشعر بيغريهم وبيحقق لهم نوع من السعادة لما يلمسوه، فيحسوا باختلاف. وطبعًا الخطوة اللي بعد كدا يلفلفوه وبعدين يشدوه. فيحسوا بقدراتهم الجديدة على اللمس والشد. يا سلام بقى لو عملتي رد فعل واضح، زي إنك ضحكتي أو حتى صرختي! وقتها بيتبسطوا إنهم بيعملوا حاجة لها رد فعل، وبالتالي بيكرروها كتير. باختصار بيحسوا إنهم أنجزوا شيء جديد بالنسبة لهم. وماتنسيش إن بالنسبة للبيبيهات، كل حاجة بتحصل لهم جديدة بالنسبة لهم، بيستكشفوها بكل الطرق الممكنة، حتى لو هيحطوها في بقهم.
السبب التاني إنهم يكونوا شافوكي بتعملي كدا لنفسك، يعني وانتي بتتكلمي في التليفون أو مع حد، بدأتي تلفي شعرك على صباعك، وتشدي لبرا بخفة، صحيح انتي مش بتقطعيه، لكن البيبي مش هيفهم كدا. والسبب الثالث هو الرغبة في استكشاف رد فعلك: هتعملي إيه؟ هتصرخي؟ هتنزّليهم على الأرض لو شايلاهم؟ هتقولي لأ، ولا هتسكتي؟ هتعيطي؟ هتضحكي؟ البيبي في اللحظة دي بيختبرك!
حل شد الشعر
بدايةً، لازم تعرفي إن العادة دي مش ممكن تستمر للأبد، وإن رغبتك إنها تنتهي هتخليها تخلص. المهم يكون عندك الرغبة والإرادة فعلًا.
الحل الأول إنه مجرد لما يبدأ شد شعرك، خليكي هادية جدًا وخدي موقف حازم، بدون صريخ أو عنف أو غضب. بمنتهى الهدوء، لو بترضعيه، وقفي. ولو شايلاه، نزليه. وقولي “لأ”. مرة بعد مرة، هيفهم إن التصرف ده مرفوض، وإنه ما ينفعش يعمله. حتى الأطفال في الأعمار الصغيرة هتفهم. وهيتحول الفعل ده لحالة من العكننة بالنسبة لهم، يعني الرضاعة بتقف، والشيل بيخلص، فطبيعي هيبطلوا لإن الفعل نتيجته مزعجة بالنسبة لهم.
الحل التاني إنك توفري له بديل يلعب فيه غير شعرك، زي دبدوب فروته ناعمة، عروسة لها شعر، أي حاجة غير شعرك. وبكده ما يكونش اتحرم من شيء بيسعده، وفي نفس الوقت أنقذتي شعرك.
الحل التالت بالنسبة للأطفال الأبرياء جدًا اللي ممكن يتشتتوا، ممكن تلهيهم أو تلفتي نظرهم لشيء مختلف. لو طفلك من النوع اللي بتعرفي تلهيه، فده حل مثالي بالنسبة له، وفعليًا مرة في التانية، هينسى ومش هيشد شعرك تاني.
الحل الرابع إنك تلمي شعرك، وممكن كمان تلبسي بونيه أو إيشارب صغير ما يظهرش شعرك، عشان ما يلاقيش حاجة يشدها. وبرضه مع الوقت هيتعلم ما يعملش كده.
5 أفكار لأكلات الرضع: بيبي فوق 6 شهور
