محتويات المقال
حب الشباب من الحالات الجلدية الشائعة بين الستات والرجالة. وعلى الرغم من إن ظهورها بيكون في فترة المراهقة، فيه ناس ناضجة بتعاني منه. في المقال ده، هنعرف إيه هو حب الشباب، وأسباب حب الشباب وكيفية علاجه.
إيه هو حب الشباب؟
حب الشباب حالة جلدية بتحصل لما بصيلة الشعر تتسد بالزيوت والأتربة والخلايا الميتة، وده بيسبب ظهور الحبوب اللي بنسميها رؤوس بيضاء أو سوداء أو دمل ملتهب. وغالبًا ما بيظهر حب الشباب على الوجه والجبهة والكتف والظهر والصدر.
عمومًا لو العلاجات المنزلية العادية أو حتى المستحضرات المتوفرة في الصيدليات ما جابتش نتيجة، هيكون من الأفضل اللجوء لطبيب جلدية لوصف علاج أقوى. وبالنسبة للستات، فحب الشباب بيظهر دايمًا في الفترة اللي قبل الدورة الشهرية، وبيختفي بعدها لوحده وخصوصًا لو بيستخدموا حبوب منع الحمل.
أسباب حب الشباب
حب الشباب له أربع أسباب رئيسية هي:
- إنتاج دهون زيادة من البشرة
- انسداد بصيلات الشعر بالدهون والجلد الميت
- بكتيريا
- زيادة في هرمون الأندروجينات androgens
نصائح للتخلص من حب الشباب
هي دي الأسباب الرئيسية لظهور حب الشباب، وكل سبب له طريقة العلاج الخاصة به. لكن فيه مجموعة نصائح ذهبية لو التزمتي عليها بما يتناسب مع حالة بشرتك هتفرق كتير في التخلص أو على الأقل التخفيف من أثر حب الشباب زي:
- اغسلي وشك على الأقل مرتين في اليوم، مش أكتر من مرتين. استخدمي منظفات خالية من الكحول، واستخدمي الماء الفاتر دايمًا. واغسلي بشكل دائري ولطيف علشان ما تسببيش أي ضرر للبشرة.
- حددي نوع بشرتك لأن كل أنواع البشرة قد تصاب بحب الشباب بس هي بتظهر بقوة مع البشرة الدهنية والبشرة المختلطة. علشان كده، لو عايزة تحصلي على أفضل النتائج، لازم تحددي نوع بشرتك بشكل صحيح علشان تجيبي لها المستحضر المناسب لها.
- رطبي بشرتك. ترطيب البشرة من العوامل المهمة للحفاظ عليها. بس طالما بتواجهي مشكلة حب الشباب يبقى هتحتاجي تستخدمي مرطبات طبيعية خالية من الكيماويات وتستخدم بعد كل غسيل للبشرة وكل ما تحسي إن فيها جفاف.
- استخدمي المستحضرات الخاصة بحب الشباب اللي مش بتحتاج وصفة طبية لأنها بتتميز بقدرتها على منع ظهور حب الشباب في المقام الأول. يحتوي معظمها إما على بيروكسيد البنزويل أو حمض الساليسيليك أو الكبريت. انتظامك على استخدام المستحضرات دي بيساعد على الوقاية من ظهورها تاني.
- اشربي مياه كتير. خلي عندك حرص شديد جدًا إنك تمنعي الشعور بالعطش ده يجي عندك. طول ما جسمك مترطب وبتشربي الكميات المناسبة من المياه، هتلاقي فرق غير عادي على كل جوانب صحتك لأن المياه أكتر حاجة تقدر تزيل السموم من الجسم.
- قللي من الميك أب. من عيوب الميك أب خصوصا لو تقيل إنه بيسد مسام البشرة وإزالته صعبة جدًا. ولو تبقى منه على البشرة بتسبب تلوث للمسام وبالتالي عودة لظهور حب الشباب. علشان كده، استخدمي الميك أب الخفيف ومزيل قوي له.
- ما تلمسيش وشك. خصوصًا لو كنتي بره البيت. والسبب في كده إن اليد أكتر مكان بيكون مليان بالبكتيريا والجراثيم والملوثات. ولو لمستي بشرتك بيها من غير تنضيف، كل التلوث هيتراكم على وجهك، وده ممكن يكون محفز لظهور حب الشباب.
- قللي من التعرض الكبير للشمس، لأن التعرض الكبير لها له آثار سلبية على بشرتك واحرصي دايمًا مهما حصل استخدام واقي من الشمس يوميًا حتى لو مش هتخرجي من البيت.
- ما تلعبيش في الحبوب أبدًا. رغم إن كتير مننا مش بيقدر يقاوم الفكرة دي. بس دي من أفضل الطرق لمنع انتشار التلوث على سطح البشرة وعلشان كمان الحد من تلوثها وتدهور حالتها وإنها تسيب أثر.
- استخدمي زيت شجرة الشاي: بيتميز الزيت ده بقدرته على مقاومة البكتيريا اللي بتنمو على سطح البشرة. هو زيت قوي جدًا. علشان كده، بتحتاجي تخففيه بالمياه وباستخدام قطنة تحطيه على الأماكن المصابة بس.
تقدري تقولي إن دي أكتر نصائح اتفق عليها خبراء التجميل ورعاية البشرة. مجموعة سهلة وتقدر أي واحدة فينا تلتزم بيها ونصيحتي الأخيرة ليكي تناولي الزنك لأنه من العناصر الغذائية المهمة جدًا في الجسم واللي بيساعد في نمو الخلايا وإنتاج الهرمونات والتمثيل الغذائي وتقوية المناعة. المتخصصين وجدوا إن الأشخاص اللي بتعاني من زيادة في حب الشباب بيكون السبب هو نقص عنصر الزنك في جسمهم وإنهم بمجرد الالتزام بتناول الزنك عن طريق الفم اتحسنت حالتهم جدًا.
جربي النصائح دي وقولي لنا في التعليفات فرقت معاكي ولا لأ.
