استخدام الحلاقة لإزالة شعر الجسم من أكتر الوسائل اللي بتتعرض للهجوم وفي نفس الوقت أكثرها استخدامًا. يمكن علشان سهولتها وسهولة توفيرها ده غير إنها مش بتاخد أي وقت مقارنة بالطرق الأخرى المنزلية أو الاعتيادية وأقلها ألمًا. ويمكن السبب في السمعة دي بتيجي من عدة مشاكل بتظهر معاها زي:
- تهيج البشرة.
- الجروح.
- نمو الشعر بشكل أكثر سمكًا.
بس الحقيقة كل المشاكل دي بيكون سببها الاستخدام مش الموس نفسه. مشاكل موس الحلاقة مش بس الستات اللي بتعاني منها، فيه رجال كتير بيعتبروا الحلاقة إجراء سخيف ومزعج. وعلشان كل المشاكل دي، جبنا مجموعة من النصائح من متخصصين في عالم الجمال والبشرة، هيقولوا لك أفضل طرق الحلاقة اللي هتخليكي تحصلي على بشرة ناعمة ونمو طبيعي للشعر.
ساندرا بول مديرة برنامج علم الجمال في جامعة كليفلاند Cleveland Clinic’s Aesthetics Program. هتعرّفنا إزاي نستخدم الحلاقة في التخلص من شعر الجسم الزائد.
نصائح قبل الحلاقة بالموس
- إياكي تحلقي على الجاف
ده بيساعد على زيادة فرصة الإصابة بجروح وبالتالي تلوثها وبيمنعك من الحصول على واحدة من أفضل مميزاتها وهي التقشير. علشان كده، أفضل وقت لاستخدامها بيكون في آخر الاستحمام لأن البشرة بتحتاج مش أقل من 10 دقايق للتليين وتكون مرنة ومستعدة لاستخدام الشفرة.
- استخدمي التقشير
تقدري تقومي بعملية تقشير خفيفة للبشرة باستخدام الليفة البلدي أو المغربية الاعتيادية أو ماسك خفيف من القهوة أو الملح الناعم على بشرتك. ده بيساعد على تلات حاجات مهمة: شد البشرة، إكسابها ليونة، وإطالة عمر الشفرة لأنها مش هتشيل طبقة كثيفة من الجلد الميت.
- استخدمي مياه أبرد
لو انتي من النوع المحب للاستحمام بمياه سخنة، فنصيحتنا إنك لو قررتي تستخدمي الشفرة، تبردي المياه شوية لأن المياه السخنة بتخلّي البشرة طرية وده ممكن يعرضها للجرح بسهولة.
- ما تستخدميش الصابون
ناس كتير فاكرين إن المياه والصابون كافيين لتسهيل حركة الشفرة على الجسم، بس الحقيقة، دي معلومة غير صحيحة بالمرة، لأن اللي بيحصل العكس. أوقات كتير أنواع من الصابون بيكون لها تأثير قابض للبشرة، ومع الشفرة ممكن تسبب جفاف، وفي نفس الوقت تسبب جروح. علشان كده، استخدام كريم الحلاقة أو بلسم الشعر أو حتى زيت من زيوت البشرة بيوفر الليونة المطلوبة للبشرة وليونة حركة الشفرة وسهولتها على البشرة وفي نفس الوقت الترطيب المطلوب بعد الانتهاء.
- ما تستخدميش شفرة حلاقة رجالي
من الأخطاء الشائعة عند ستات كتير هي فكرة إن الشفرة الرجالى ما تفرقش عن المخصصة للستات حتى بيكونوا شايفين إن مفيش مبرر أروح أجيب واحدة حريمي غالية بينما الرجالى الأرخص سعرًا متوفرة. بس الحقيقة، انتي بترتكبي جريمة ضد نفسك، لأن الشفرة الرجالي مصممة لمهمة معينة: العمل على بشرة الوجه لنمط نمو شعر في مكان معين ولها حتى حركة محددة ومحدودة. على عكس الشفرة الحريمي المخصصة للجسم: زوايا الشفرات مع حركة الرأس مخصصة للتماشي مع منحنيات الجسم بشكل صحيح. فللستات، ما تستخدميش شفرة رجالي على جسمك، وللرجال، ما تستخدمش شفرة جسم على وجهك.
- انتبهي لإتجاه نمو الشعر
بتقول السيدة ساندرا بول مهم تشوفي إتجاه نمو الشعر فين وتمشي عكسه. مثال: شعر الساق بيميل للنمو إلى أسفل. علشان كده، أفضل إتجاه لحلاقته هو من الأسفل إلى أعلى.
- اقفلي المسام
زي ما قلنا: البشرة بتحتاج مش أقل من 10 دقايق، تحت المياه الدافئة علشان تكتسب الليونة المطلوبة للحلاقة. بس اللي بيحصل بعد كده إن مسام بشرتك بتكون مفتوحة. علشان كده، بعد الانتهاء من الحلاقة وإزالة كل أثر لكريم الحلاقة، قومي بشطف جسمك بالمياه الباردة لأن دي أفضل وسيلة لغلقها. وبعد كده، قومي باستخدام كريم مرطب على بشرتك. ما تستخدميش أي منتج بعد الحلاقة غير لما تقفلي مسام بشرتك.
- تجاهلي خرافة الشعر بيتخن أو بيكتر
من أكتر الإشاعات اللي بتطلع على الوسيلة دي هي إن الشعر بيتخن وبيكتر وبيكون أكثر خشونة. وده طبعًا كلام مش حقيقي لإن اللي بيحصل إن مدى كثافة نمو الشعرة أو سمكها بييجي من داخل الجسم مش من الحلاقة الخارجية.
- استخدمي واقي من الشمس
بعد الحلاقة عمومًا، البشرة بتكون حساسة عن الأوقات العادية وفي الأوقات المثالية، المفروض إنك تستني 24 ساعة قبل الخروج بعد الحلاقة، علشان تكون بشرتك استعادت عافيتها من تاني. بس عمومًا استخدمي واقي الشمس يوميًا حتى لو مش هتتعرضي للشمس لأن دوره في حماية بشرتك قوي جدًا.
- تخلصي منها بانتظام
من العلامات المهمة في استخدام ماكينة الحلاقة إن التخلص من الشعر والجلد الميت منها سهل. لو ده ما اتحققش، يبقى لازم تتخلصي منها حتى لو هي لسه حادة علشان تحمي نفسك من تسرب أي بكتيريا لجسمك لو حصل أي جرح.
أتمنى تعجبك النصائح دي وتمشي عليها. هتلاحظي فرق حقيقي في نتيجة شكل بشرتك، وهتلاقي نفسك بتستمتعي بشكل بشرة صحي ولامع وخالي من الشعر طول الصيف.
