محتويات المقال
فيه مقولة بحبها بتقول: “لو ما ظهرش على تصرفاتك تأثير الدين بتاعك عليك يبقى دينك مش بيفيدك”.. في رأيي إنه دور الأديان الحقيقي هو إنها تخلي حياة الناس أفضل وتساعدهم يعيشوا حياة فيها إنتاجية وسلام نفسي..
ومن هنا بدأ اهتمامي بقراءة تعاليم الأديان المختلفة.. وإللي من نتائجها مساعدة الناس يعيشوا حياة أفضل.
من الديانات إللي شدتني تعاليمها ديانة الزن.. في البداية ظهرت ديانة البوذية في الهند وبدأت تنتشر في أرجاء شرق آسيا وبقت مدارس ومذاهب مختلفة.. ويعتبر الزن هو تطور الديانة البوذية في اليابان وهو تاني أكبر ديانة في اليابان بعد ديانة اسمها الشنتو.
تمحورت الديانة البوذية حول “الانعتاق”، لكن الزن ركزت أكتر على “الانسجام في الحياة”، علشان كدة تعاليمها بقت بتتدرس لناس كتير وبقت بتهم كل الناس حتى إللي مش مهتمين بدراسة الأديان أو القراءة عنها يعني ممكن نعتبرها تنمية ذاتية أكتر. أخيرا عايزة أقول إنه كلمة الزن معناها “التأمل والاستغراق في التفكير”.
من أجمل الكتب الجديدة إللي قرأعها وإللي بتبسط عادات وأفكار الزن، كتاب “فن الحياة البسيطة: 100 عادة يومية لحياة أكثر هدوءًا وسعادة يقدمها واحد من كبار رهبان الزن اليابانيين”.. الكتاب من تأليف راهب الزن شونميو ماسونو. وهو عن دار نشر التنوير -منشورات الرمل وجبته من مكتبة الشروق.
إللي بيحبوا يقرأوا باللغة الإنجليزية هيلاقوا الكتاب باسم The Art Of Simple Living
المؤلف هو الكاهن الأكبر في معبد زن ياباني قديم عمره 450 سنة وهو أحد أهم مصمممي حدائق الزن في العالم وبيدرّس في كذا جامعة.
الراهب شونيمو ماسونو
الكتاب بيقدم 100 عادة يومية بيعملها رهبان الزن علشان حياتهم تبقى أحسن والمفروض إنه دي عادات لتحسين حياة كل الناس.. هنقل لكم من الكتاب أكتر 11 عادة/ فكرة عجبوني مع تعليقي وشرحي عليهم.
1-خصص وقت للتفكير في الولا حاجة
في حياتنا اليومية المشغولة والزحمة والمليانة أفكار.. ياترى مين عنده وقت يفكر في الولا حاجة؟ عايزة أقول لكم إنه الرجالة أشطر من الستات في الموضوع ده وعندهم حاجة فعلا اسمها الـNothing box وهي التفكير في الولا حاجة.. وكتير تلاقي جوزك مسهم وباصص في السقف وتسأليه مالك وإنتي متخيلة إنه بيفكر في مصيبة أكيد، وتلاقيه بيقولك وهم مبتسم ابتسامة كسولة :”ولا حاجة يا حبيبتي”. أهو هو ده إللي محتاجين نعمله.. وإللي بالمناسبة يعتبر جزء من تمارين اليقظة أو الـMindfulness techniques ..
بيتعمل إزاي؟ اقعدي في مكان هادي من غير تشتيت لمدة 10 دقائق.. غمضي عينك أو سيبيها مفتوحة لو بصرك مش هيزوغ على حاجات.. خدي شهيق وطلعي زفير طويل.. هتلاقي أفكار كتير بتتزاحم جوة دماغك.. تخيلي الأفكار دي سحاب.. وكل ما تهجم عليكي فكرة تخيلي إنها سحابة وبتتطير.. اعملي كدة كل يوم لحد ما توصلي إنه فيه 10 أو 5 دقايق إنتي فعلا بتتنفسي بس ومش بتفكري في أي حاجة.
2-رتب ونضف المكان إللي عايش فيه بنفسك
لو ركزنا شوية.. هنلاقي الناس إللي مهتمين بترتيب بيتهم وتنضيفه كويس بنفسهم حياتهم فيه إنتاجية ونشاطهم أعلى حتى لو عندهم أمراض مزمنة، ودماغهم مش مشوشة وإلى حد ما حياتهم مستقرة أكتر.. في معابد الزن الرهبان بينضفوا لنفسهم المعبد وبيعملوا كل حاجة بإيديهم.. الراهب شونيميو –مؤلف الكتاب- بيقول :” مع كل كنسة من المقشة.. بتكنس التراب عن ذهنك. مع كل مسحة من قماش التنضيف قلبك بيلمع وبيتلألأ أكتر.. علشان تبقى نشيط وذهنك رايق لازم ترتب والتنضف المكان إللي إنت قاعد فيه.
فيه دراسة اتعملت لقت إنه الناس إللي بتغسل المواعين وهي مركزة وبتتأمل ده قلل القلق عندهم بشكل كبير.. آه والله 🙂
3-خد وقتك في عمايل كوباية القهوة الصبح
أغلب الناس لما بيعوزوا يشربوا قهوة يا إما بيعملوا كوباية قهوة سريعة التحضير.. يحطوا معلقة قهوة على شوية مية مغلية أو يشتروا قهوة من المحل وهمّا رايحيين الشغل.
الكتاب بيقولك إنك لما بتعمل قهوتك خطوة بخطوة من أول إنك تطحن البن وتولع النار وتغليه بالراحة.. ده بيخليك تبذل وقت وجهد أكتر وده بيخليك ترتبط بالحاجة أكتر وتستطعمها علشان إنت بذلت مجهود علشان تاخدها..
وبيختم الراهب الفقرة دي بجملة: ” عندما نتجنب بذل الوقت والجهد، فإننا نتجنب مباهج الحياة”.
4-ادي نفسك وقت تفكر وإنت قاعد
في ديانة الزن.. فيه تمرين مهم بيتعمل الصبح وبالليل اسمه الـ”زازن” يعني التأمل الهادئ.. الناس ما يقدروش يمارسوا التأمل وهما بيتحركوا لإن الإنسان وهو بيتحرك أو بيمشي مثلا هيفكر في أفكار عملية زي هنطبخ إيه عالعشا.. لكن الأفكار التأملية والابداعية زي الهدف من الحياة مثلا أو معنى السعادة مش هقدر أفكر فيه كويس وأنا بتحرك..
علشان كدة مهم يكون فيه وقت في اليوم بنقعد فيه بهدوء ونفكر في الأمور الإبداعية والفلسفية.
اقعد.. ركز على التنفس.. خلي عقلك يستقر.. وانطلق..
5-حاول تعتني بأي حاجة حيّة
زي النباتات او الحيوانات الأليفة.. الرعاية إللي بنديها لكائن حي تاني هو إللي بيخلينا نطوّر عقل بيعرف يهتم بالأشياء عقل بيشعر بالمحبة اتجاه الآخرين.
تجربة: شهر ونصف من تربية الزرع في بيتي
كتاب فن الحياة البسيطة
6-حرر نفسك من المال
شونيمو بيقول إنه الفلوس بالنسباله مهمة لإنه عنده أسرة بيصرف عليها وعنده حاجات ضرورية محتاج يشتريها بيها. علشان كدة اعتبار رهبان المعابد مش محتاجين الفلوس خالص ده كلام فاضي.. كلنا محناجين فلوس حتى الرهبان إللي قرروا اتباع حياة الزهد..
لكن الفكرة بقى إللي بيشرحها شونيمو إنك كل ما بتجري ورا الفلوس كل ما هتهرب من إيدك..
طب أعمل إيه؟ فكر في هدفك الأسمى إللي بتشتغل علشانه واتحرك زي مثلا : إزاي أساهم في المجتمع إللي أنا عايش فيه؟.. أو إيه إللي ممكن أقدمة للناس؟ .. هتلاقي نفسك بتنجح وبتكبر والفلوس هتجيلك في الطريق..
7-اقبل الحقيقة زي ما هي واتعلم إنك تكون مستعد ليها
لو شخص جاله سرطان لا قدر الله.. مش هيقدر يغير الحقيقة دي: إنه السرطان جاله خلاص.. هيحتاج يقبلها الأول علشان يقدر يعدي الأزمة دي بشجاعة وثبات.
إحنا ما نقدرش نغير الحقائق إللي مش عاجبانا.. ممكن نلعن الحياة ونلعن المشاكل لكن ده مش هيغير الحقيقة ومش هيمنعنا من إننا لازم هندخل برجلنا في الموقف ده.
الأمر متعلق بإعداد نفسك إنك تقبل الحقايق زي ماهي.. ممكن يكون ده شكله استسلام لكن هو العكس تماما..
لازم تتعلم تفرق بين الافتراضات والحقائق.. ولما تلاقي حاجة حقيقة.. تقبلها زي ما هي..
8-اتعامل على إنه كل لقاء هو الأول والأخير
علشان تقدر تعمل علاقات مع الناس حميمية وقوية جدًا، محتاج ما تاخدش الوقت إللي بتقضيه معاهم For Granted .. محتاج تتعامل مع كل خروجة أو لقاء أكنه اللقاء الأول والأخير.. كل لقاء تبقى عايز تسيب فيه تأثير طيب على إللي قدامك وتعمل معاه Connection حقيقي وتفضي معاه Quality time .
وعلى رأي الشاعر مصطفى إبراهيم :
لو كنت عارف إن هي دي المرة الأخيرة
مية، مية كانت هتفرق في الوداع!
9-امشي على رتم إللي قدامك: لا تسرع.. ولا تبطّأ
فيه مثل ياباني بيقول :”سوتاكو دوجي”.. يعني : النقر من الداخل والخارج معًا”. يعني إيه الكلام ده؟ يعني لما الكتكوت بيحاول يخرج من البيضة بيبدأ ينقر على البيضة علشان يكسرها من جوة، الأم بتسمع النقرة وبتشوف قوتها وبتبدأ هي كمان تنقر من برة البيضة علشان تساعد الكتكوت يخرج.. الأم لو نقرت جامد وكسرت البيضة قبل ما الكتكوت يكون مستعد تماما للخروج.. هيموت الكتكوت.. ولو برضه الأم ما تقرتش خالص الكتكوت مش هيعرف يكسر البيضة لوحده وهيموت فيها..
طيب نتعلم إيه من القصة دي؟
نتعلم إننا في التعامل مع الناس زي تربية الأطفال وفي العلاقات زي الحب وفي الشغل كمان.. لازم نركز قوي مع رتم الناس ونتواصل معاهم بالشكل الدقيق. لا نستعجلهم ولا نتجاهلهم خالص.. نقدم كل حاجة بشكل محسوب في الوقت المناسب.
10-ركز على مزايا الآخرين
وبالذات في الوقت إللي عيوبهم بتبان فيه.. لما تتعرف على شخص لأول مرة ما تفضلش تفصصه علشان تطلع مساوؤه، اعمل العكس تماما.. خلي عينك تبص على الحاجات الحلوة إللي فيه.. وحتى لما تكون مع حد بتحبه ويعمل غلطة أو يظهر عيب من عيوبه بدل ما تستغرق في التفكير في العيوب ابدأ ارصد المميزات علطول.. الطريقة دي هتخليك تشوف الناس بشكل أفضل.. وتتعلم تحط نفسك مكانهم وهتقلل غضبك وهتقلل أعداءك.
11- ابعد عن السموم الثلاثة
في الزن عندهم حاجة بيسموها “السموم الثلاثة” وهي الطمع والغضب والجهل أو ما تحس نفسك بتفكر بطمع أو هتغضب أو مختار الجهل وعدم المعرفة والبحث فكر نفسك بإنه دي سموم حياتية بتدمر شخصية الإنسان ومش بتوصله لحاجة..
دول 11 درس من الكتاب لو عجبتكم الدروس دي هتلاقوا في الكتاب 100 درس كمان.. اتمنى الكتاب يفيدكم زي ما فادني.
