محتويات المقال
الرؤوس السوداء من أكتر مشاكل البشرة المنتشرة سواء وسط الستات أو الرجال، وبيعاني منها أصحاب البشرة الدهنية. مش بتظهر بس على بشرة الوجه لكن ممكن تظهر في الرقبة، في الذراعين، في الكتف أو حتى الظهر.
إيه هي الرؤوس السوداء؟
هي في الأساس انسداد في بصيلات الشهر بسبب تلوثها والانسداد ده بيكوّن ما هو معروف بالرؤوس البيضاء، ودي لما تتفتح وتتعرض للهواء، لونها بيغمق وبيتكون عندنا الرؤوس السوداء.
عيوب الضغط على الرؤوس السوداء
كلنا بنسعى للتخلص منها وكتير مننا للأسف بيضغط عليها علشان يفرغها ويتخلص منها، ودي أكتر طريقة غلط لأنها بتحافظ على إن المشكلة تفضل موجودة وأوقات تتفاقم. علشان كده، هنرشح لك وسيلة من وسائل إزالة الرؤوس السوداء، وهي اللاصقة المزيلة للرؤوس السوداء وهنقول لك إزاي تستخدميها صح علشان تحصلي على أفضل نتائج معاها.
فيه خطأ شائع في استخدام اللاصقة وهي وضعها على الأنف وبلها بالمياه وانتظار مرور الوقت المحدد. وبعد كده، إزالتها معتبرين إن دي أفضل نتيجة. بس الحقيقة ده غلط كبير، فتعالي معانا اعرفي الصح إيه؟
خطوات استخدام لاصقة الرؤوس السوداء
- اغسلي إيدك كويس بالمياه والصابون.
- اغسلي وشك بالمنظف الاعتيادي بتاعك ويفضل يكون مضاد للبكتيريا خالي من الكحول.
- اعملي لوشك حمام بخار عن طريق ملو حلة مياه، وبمجرد ما تغلي عرضي وشك للبخار بشكل خفيف لمدة 10 دقايق لحد ما مسام بشرتك تفتح أو حتى بعد حمام دافئ، هتلاقي مسام بشرتك مفتوحة.
- حطي اللاصقة على بشرتك بالشكل الإعتيادي واستني النتيجة.
هتلاحظي فرق كبير جدًا في نتيجة تنضيفها لبشرتك لأنك ببساطة ساعدتيها إنها تشتغل معاكي بالشكل الصحيح. بس لازم تاخدي بالك من نقطة معينة. إزالتك للاصقة دي مش معناها إن عملية إزالة الرؤوس السوداء انتهت. بالعكس، المرحلة دي هي أهم مرحلة اللي لو اتعاملتي معاها صح هتكوني شبه قضيتي على المشكلة إنها تعود تاني بسهولة. دلوقتي انتي بشرتك مسامها مفتوحة وعرضة للتلوث. فتعالي نعرفك تعملي إيه:
- استخدمي غسول للبشرة مضاد للبكتريا وخالي من الكحول علشان تمنعي نمو أي بكتيريا قد تسبب ظهور الحبوب مرة تانية.
- اغسلي بشرتك بمياه باردة لأن المياه الباردة ليها تأثير قوي على غلق المسام. وطهري إيدك بعد الانتهاء.
- وأخيرًا حطي تونر على بشرتك لأن أغلب أنواع التونر بتقوم بعمل إغلاق للمسام بشكل ممتاز، وبعد كده، رطبي بشرتك كويس جدًا.
في الآخر عايزين نقول لك إن عملية التنظيف السطحي دي مش كافية لوحدها للتخلص من مشكلة الرؤوس السوداء. لكن فيه شوية نصائح هتحتاجي تتبعيها على التوازي مع التنظيف السطحي للحصول على أفضل النتائج، منها:
- النظافة هي المفتاح. لازم تغسلي وشك يوميًا مرة الصبح ومرة قبل النوم. مع استخدام منتج لتقشير الجلد الميت على الأقل مرتين في الأسبوع للحصول على بشرة صحية.
- احنا نتيجة ما نأكل، يعني أي مشكلة صحية على البشرة اعرفي إنها انعكاس لنظامك الغذائي. وأي نظام غذائي خالي من الألياف والبروتين والزبادي والفواكه ومليان بالسكريات والنشويات والمواد الحافظة والمضرة نتيجته دايمًا مشاكل صحية خارجيًا وداخليًا.
- استخدمي الوصفات الطبيعية على قد ما تقدري وابعدي عن المنتجات الكيميائية على قد ما تقدري لما لها من ضرر حقيقي على المدى البعيد على صحة بشرتك. يعني عناصر زي العسل والقرفة والزبادي والبيكربونات والليمون كلها عناصر طبيعية بالاستخدام المتكرر هتحصلي على النتيجة اللي تتمنيها.
آخر حاجة أقولها لك: اهتمي بنفسك لأنك تستاهلي وأهم عنصر في المعادلة.
